Рифкать Миңнеханов трассада тизлекне сәгатенә 70 километрга кадәр чикләргә тәкъдим итте
«Юл хәрәкәте иминлеге» дәүләт бюджет учреждениесе директоры Рифкать Миңнеханов, Татарстан юлларында тизлек режимын киметергә кирәк, дип саный. Ул Татарстан трассаларында тизлекне сәгатенә 70 километрга, ә шәһәрләрдә сәгатенә 40 километрга кадәр чикләргә тәкъдим итте, дип яза Kazanfirst порталы.
Юл хәрәкәте иминлеге буенча республика комиссиясе утырышында тиешле инициатива белән «Юл хәрәкәте иминлеге» директоры Рифкать Миңнеханов чыгыш ясады. Аның әйтүенчә, үлемгә китергән аварияләрнең сәбәбе – тизлек режимын үтәмәү, каршы як юлга чыгу, исерек килеш йөртү.
Татарстан эчке эшләр министры Артем Хохорин, автомәктәпләрнең эшен анализларга кирәк, дип белдергән. «Вазгыятьне үзгәртеп була – бары тик тизлек режимын киметергә генә кирәк», – дигән Рифкать Миңнеханов.